محسن حسنين

× أيام الرئيس مبارك سألنى وزير محترم، يشغل الآن منصبًا دوليًا مهمًا، كان ولا يزال حتى الآن صديقا لى: مش كفاية بقى يا أستاذ انتقاد لقراراتى..؟!

قلت له وأنا أبتسم: يا معالى الوزير إحنا بيننا وبين الحكومة اتفاق غير مكتوب.. إنتم بتعملوا اللى إنتم عايزينه.. وإحنا بنكتب اللى إحنا عايزينه..!!

الكلام ده كان من عشرين سنة فاتت.. لكن يبدو إن الاتفاق غير المكتوب بيننا وبين الحكومة لا يزال ساريًا حتى الآن..!

× الكتائب الإلكترونية لإخواننا البعدة شغالة زن على ودان المصريين ليل نهار.. شائعات وأكاذيب وأخبار وأرقام مضروبة ومغلوطة..!

 نصيحتى لكم: إلعبوا غيرها.. فألاعيبكم مكشوفة ومفضوحة.. ولن يصدقها أحد.. فالمصريون شالوا العصافير من زماااااان..!

× آخر افتكاسة للدكتور الأزهرى “إياه”، اللى بيفتى على روحه، عاشق الكاميرات والفضائيات والبلح الأمهات، هى إن الراقصة لو ماتت
وهى “تسعى على رزقها”.. على واحدة ونص.. فهى شهيدة..!!

أنا شاكك إن الراجل ده مابيجيبش فتاواه من الكتب الصحاح.. ده أكيد بيجيبها من كتاب “ما تزوقينى يا ماما.. قوام يا ماما”..!!

× بالمناسبة الدنيا قامت ولم تقعد على كلام فارغ قالته ممثلة مخضرمة من سنتين فاتوا..!

والغريبة إن مشايخنا الأفاضل هاتك يا استشهادات وإثباتات من القرآن والسنة؛ لإثبات خطأ ما قالته بسلامتها؛ وكأنهم يردون على البخارى أو أبو حنيفة أو على شيخ مشايخ الإسلام فى كل عصر وأوان..!

يا جماعة فضوها سيرة بقى.. دى مجرد ممثلة كل مؤهلاتها إنها كشفت فى أفلامها حتة بتلاتة تعريفة من اللحم الأبيض المتوسط..!!

× ركوب الترند أصبح سكته سهلة جدًا.. الممثلة من دول تهبد لها هبدتين فى الدين.. وتفتى بجهل واضح وفاضح فى أمور ما أنزل الله بها من سلطان.. والدنيا تهيص والمشايخ يردوا والسوشيال ميديا تولع.. وحضرتها آخر انبساط وزبادى فى الخلاط..!!

يخرب بيت التفاهة والتافهين والتافهات من الممثلين والممثلات الأحياء منهم والأموات..!

× أنا زعلان ومكتئب وعايز الأرض تنشق وتبلعنى؛ بعد ما عرفت “الشهادات التى يحملها” مطربو المهرجانات المليارديرات بيكا وأستيكة وشطة وبطة وكزبرة ووزة مطرية..!

يا ليلة سودا.. كلهم يا مولاى حاصلون على “شهادات الميلاد” وبس.. وأغلبهم مبيعرفش يفك الخط..!