× هما المصريين جرى لهم إيه..؟!

 روحهم ليه بقت فى مناخيرهم.. وأقل خلاف بسيط بينهم بينتهى اليومين دول بجريمة قتل بشعة..؟!

 فين المصريين بتوع زمان اللى كانت كل خناقاتهم تهويش فى تهويش..!!

  راحت فين أيام الشتايم بالأب والأم..؟!! راح فين زمن الردح الجميل..؟! راحت فين الشلاليت والضرب على القفا..؟!

كل دا راح وانقضى.. حتى الخناقات اتقلِّت بركتها ياجدعان.. عليه العوض ومنه العوض..!!

× والله العظيم عيب وحرام إن الأزهر بجلالة قدره؛ وبشيخه الجليل صاحب القيمة والقامة؛ وعلمائه الأجلاء الأفاضل.. سايبين الدكتور “الضلالى”،
اللى بيفتى على روحه، يشيع كل هذه الفتنة بين المسلمين بفتاواه الشاذة التى ما أنزل الله بها من سلطان؛ والتى وصلت إلى حد إشاعة الفسق والفجور؛ وتحليل ما حرمه الله ورسوله.. والدعوة إلى أعمال قوم لوط والعياذ بالله..!!

ليه سايبينه..؟! فالدكتور “الضلالى” مريض بداء الشهرة والأضواء؛ وفتاواه الشاذة التى ما أنزل الله بها من سلطان أصبحت خطرًا على الأمن والسلم الاجتماعى.. ولذلك ليس أمامكم إلا حل من تلاتة:

إما أن تمنعوه.. أو تحاكموه.. أو تعالجوه على نفقة اللى على قنواتهم بيستضيفوه..!!

× واضح إن النائبة الموقرة؛ التى استنكرت قيام الحكومة بمنح أطول إجازة للموظفين؛ وتقدمت بطلب إحاطة لرئيس الوزراء ووزراء التخطيط والمالية والقوى العاملة حول التأثير السلبى لذلك على الاقتصاد..واضح إنها ست طيبة وعلى نياتها..!!

فحكومتنا الرشيدة عارفة بالضبط أى شعب تحكمه..فهى تعلم إن شعبنا الجميل بيكره العمل كره العمى.. وبيحب الإجازات والراحة زى عينيه.. وشعاره فى الحياة “نام وارتاح يأتيك النجاح”..!

وإذا كنتوا نسيتوا اللى جرى هاتوا الدفاتر..!!

× عيب قوى إن بعض وسائل الإعلام الأمريكية، اللى هاتخش جهنم حدف، هاتك يا تريقة ومألسة ونكت على الراجل البركة، اللى لابيهش ولا بينش، الحاج “أبو نسمة” ساكن البيت الأبيض؛ وبيقولوا إن عمره الافتراضى انتهى.. وإنه مش دارى باللى بيحصل فى الدنيا..

واللى زاد وغطى إنهم بيصوروه فى أوضاع مش لطيفة.. مرة وهو تايه مش عارف رايح وللا جاى ، ولا عارف راسه من رجليه.. ومرة وهو بيلخبط وبيهلفط فى الكلام.. ومرة تالتة وهو بيتكع بل ويقع على الأرض والحرس بيسنّدوه..!!

والله عيب.. دول ناقص إنهم يقولوا إن “أبو نسمة” هو سبب كل بلاوى الدنيا، وإنه السبب الرئيسى فى إن البيت الأبيض عمره ما بينفع أبدًا فى اليوم الأسود..!!