صالون الرأي
آخر كلام
By amrأكتوبر 27, 2019, 13:54 م
1817
# ياليلة سودا..شوية مطرة بهدلت البلد ؛وغرقتها فى شبر مية؛ ونزعت ورقة التوت عن المسؤلين؛ وفضحتهم فضيحة اللحمة البتلو فى سوق الجمعة..!!
شوية مية أظهرت لنا إن محافظ القاهرة وأجهزته والكل كليلة نايمين فى العسل وبياكلوا رز مع الملايكة..!
شوية مية كشفوا لنا حرامية المحليات اللى ماشفناهم وهم بيسرقوا فشفناهم وهم بيغرقوا ..!
شوية مية أكدوا لنا بالدليل القاطع والبرهان الساطع إنه إذا كان إناللى بنى مصر كان فى الأصل حلوانى.. فإن اللى عمل شوارع القاهرة أكيدبتاع بسبوسة..!!
# واضح إن المسؤلين عن شركة الحديد والصلب بيهرجوا..! فقد أرسلوا ردودا لاتقنع طفلا فى كى جى ون؛على كل ماأثاره الجهاز المركزى للمحاسبات من شكوك فى عدم قدرة الشركة على الاستمرار فى ظل الأوضاع المتردية الراهنة..!!
مسؤولو الشركة أكدوا أن كل شىء تمام وعال العال ، وأن الدنيا آخر انبساط وزبادى فى الخلاط..!!
وأنا من جانبى بأحيى مسؤولي الشركة وباهديهم أغنية موسيقار الأجيال شعبولا”كداب ياخيشة كداب قوى”..!
# مش عارف الناس زعلانة ليه من نائب البرلمان اللى بيطالب بإطلاق اسم على عبد العال رئيس البرلمان على أى جامعة أومدينة أسوة بأحمد زويل الحائز على جائزة نوبل..؟!!
ياجماعة النائب مش منافق لاسمح الله ولاحاجة..فاللى “عملهوبيعمله عبدالعال فينا وفى البلد” ماعملوش زويل أبدا..والقطنة مابتكدبش على رأى الست نظيفة..!!
# أقول لكل اللى بيطالب بخفض مخصصات الوزراء وأعضاء مجلس النواب المصرى الى النصف أسوة بما حدث فى لبنان: ياجماعة بطلوا مشاهدة أفلام الخيال العلمى؟!
# أنا مش زعلان من زيارة موسيقار الأجيال الأستاذ حمو بيكا لمستشفى 57357 ؛ ولازعلان من منظر الدكتورة الكيوت وهى بتشرح لسيادته أحدث الطرق العالمية لمعالجة الأورام السرطانية وهو بيستمع لها شامخا شموخ العلماء اللى فاهمين كل حاجة..أنا اللى مزعلنى إن مفيش أغنية وطنية مصاحبة لهذا الحدث التاريخى الكبير..!
على الأقل كانوا ذاعوا أغنية ” عظيمة يامصر ياأرض اللوا”..!!!
# بالمناسبة..موسيقار الاجيال الأستاذ بيكا وعدوه اللدود الأستاذ شطة ناويين يعملوا الجلاشة مع نقيب الموسيقيين هانى شاكر ؛ لإصراره على منعهم من الغناء..!
العيال دى شرانية وبيلبسوا الشرابات على اللحم ويعملوها…هاتوحشنا ياهانى..!!
