بصراحة، رغم فوز منتخب مصر على زيمبابوى والكونغو لكن الفريق بعافية حبتين، وفيه حاجة غلط؛ فالفريق بيلعب بالبيومى، وواضح إنه بيكسب بدعا الوالدين والجماهير الغلبانة اللى بتزحف على الاستاد ونفسها تفرح بحاجة حلوة لمصر.
وربنا سترنا وأنقذنا من فضيحة أمام الكونغو؛ لأن العارضة كانت بتلعب معانا وواقفة حارس مرمى تانى جنب الشناوى..!!
عايزين حد ينقذ منتخب مصر قبل فوات الأوان، ويشوف لنا حل فى الفريق وفى الأخ أجيرى بالمرة.. فليست فى كل مرة تسلم الجرة.. ربنا يستر..!!
أنا معجب جدًا بموقف الجامعة العربية تجاه الأحداث المشتعلة فى منطقتنا؛ فهى زى الساعة السويسرية لا بتقدم ولا بتأخر.. فهى مؤمنة بالمقولة الشهيرة «من تدخل فيما لا يعنيه لقى مالا يرضيه»؛ لذلك فهى تتفرج على كل ما يحدث، فى الخليج والسودان واليمن وسوريا والعراق، دون أن تحرك أى ساكن..!!
الجامعة العربية بتفكرنى بمقابر الغفير والسيدة نفيسة؛ لذلك أردد كلما مررت عليها: «السلام عليكم دار قوم مؤمنين.. أنتم السابقون ونحن اللاحقون».. وحدووووووووه..!!
قلتها وأقولها.. بوتاجازات الفضائيات اللى بيهيجوا وبيسخنوا أى حاجة وكل حاجة ليسوا على مستوى المرحلة الحالية.. دول عايزين أى جنازة ويشبعوا فيها لطم.. والمرحلة الحالية ليست مرحلة ولولة ولطم على الخدود؛ لكنها مرحلة بناء وتنمية ووضع مصر على الطريق الصحيح بأجرأ برنامج إصلاح اقتصادى..
إذا لم يتدخل المجلس الأعلى للإعلام لوقف هؤلاء البوتاجازات أمال مين اللى ها يتدخل..؟!
بعد أن تقمصت دار الإفتاء المصرية دور اتحاد الكرة وأصدرت بيانا تطالب فيه جماهير الكرة بالالتفاف حول منتخبنا القومى لكرة القدم.. أخشى أن يرد اتحاد الكرة الجميل ويفتى لنا فى أمور الدين.. ربنا يستر..!
معذور الكابتن «أحلق شنبى» إنه ما يعرفش إن موريتانيا دولة عربية..!
هو فاضى علشان يعرف.. كفاية عليه فرحته بملابسه الداخلية وهلا هلا ع الفانلة.. !!
مش عارف ليه كل هذه الزيطة والزمبليطة على ما قالته المطربة اللبنانية أم شعر كنيش عن مصر..!!
ياجماعة كبروا دماغكم.. دا «لو كل كلب عوى ألقمته حجرا لأصبح الصخر مثقالا بدينار» ..!