واضح إن الأخ علاء والى، رئيس لجنة الإسكان بمجلس النواب، راجل طيب وعلى نياته؛ فهو غضبان، ومعه أعضاء اللجنة، من محافظ القاهرة لعدم تلبيته لدعوة اللجنة لمناقشة عدد من القضايا التى تهم المواطنين فى الوقت الذى لبى فيه المحافظ دعوة لافتتاح محل كباب وكفتة بالنادى الأهلى..!!
إيه الكلام الفاضى ده..؟!! بقى عايز المحافظ يسيب الكباب والكفتة وسلطات الطحينة والبابا غنوج علشان شوية مشاكل للمواطنين لا راحت ولا جت.. يا أخى عيب.. فمشاكل المواطنين ممكن تستنى لكن الكباب والكفتة والبابا غنوج مايستنوش أبدا..!
وبعدين إحمدربنا وبوس إيديك شعر ودقن إن الدعوة كانت لمحل كباب وكفتة مش فول وطعمية لا مؤاخذة..!!
انتصاراتنا فى أول تلات ماتشات فى كأس الأمم الإفريقية لا يمكن أبدا أن تكون بجهد اللعيبة التايهة فى الملعب أو المدرب اللى حافظ مش فاهم.. دى حاجة من اتنين.. إما إنها ببركة دعا الوالدين.. أو ببركة دعوة ولية ساعة مغربية.. صدقونىهى مفيش غيرها.. دعوة ولية ساعة مغربية..!!
إلى كل اللى بيسألوا: إزاى يسمحوا لسما المصرى بدخول ستاد القاهرة لوحدها قبل مباراة مصر وأوغندا..؟! وإزاى يسمحوا بدخولها بملابس غير لائقة..؟ وإزاى يسمحوا بالتقاط صور لها بمختلف الأوضاع..؟! وإزاى.. وإزاى.. وإزاى..؟!
على كل هذه التساؤلات الغريبة المريبة أرد فأقول: بسم الله الرحمن الرحيم.. الإجابة: تونس..!!!!!!
يا جماعة ما تشوفوا لنا إيه حكاية الحرايق اللى ورا بعضها دى فى الموسكى والعتبة؟!!.. وبعدين إزاى تتحرق عشرات المحلات وإدارة المطافى بذات نفسها على بعد أمتار من الحريق..؟!
دى لو العتبة لسه مع إسماعيل ياسين كان عرف يحافظ عليها أكتر من كده..!!!!
على فكرة المثل اللى بيقول: «اللى يعمل ضهره قنطرة ألف من يدوسوا عليه» مالوش علاقة خالص بوضعنا العربى الراهن.. وأى تشابه فىالأحداث أو الأسماء هو من قبيل الصدفة اللى هى خير من ألف ميعاد.. لذا لزم التنويه..!!!
كويس جدا إنهم أوقفوا عن العمل ناظر المدرسة اللى عمل سرادق عزاء فى حوش المدرسة؛ لأنهم لو سابوه كان ساق فيها وعمل حنة بنت أخته فىأوضة التدبير المنزلى..!!