محسن حسنين

× يا ناس سيبونا من الكلام الفاضى والهرى اللى لا بيودى ولا بيجيب عن مذبحة الأشجار وطمنونا.. حكاية قلم الهضبة وصلت لفين..؟!

وشيرين فعلا اتخطبت لحد غير “حبيب”.. ولا دى تشنيعة وظلومة.. وفصل من فصول الجواز والطلاق اللى رايح جاى بينها وبين “حبة الجلب”..؟!

طمنونا الله يطمنكم..!

× بصراحة أنا مش عارف ليه الناس عاملة زيطة وزمبليطة وأزمة من غير لزمة بسبب مذبحة الأشجار المعمرة اللى شغالة اليومين دول..؟!

يا جماعة ماتكبروش الحكاية كدا.. وماتقولوش إن ما يحدث هو اغتيال للطبيعة مع سبق الإصرار والترصد..!

الناس اللى بتقطع الأشجار دول ناس مخلصة لـ”تراثنا” المصرى العريق..!

فإحنا الشعب الوحيد فى الدنيا اللى بيبور الأرض الزراعية، اللى إتكونت على مدار آلاف السنين، ويزرعها أعمدة خرسانية.. وبعدين نروح نستصلح الصحراء ونزرع فيها..!

وهذا التراث المصرى العريق مفرود له صفحات فى التاريخ بعنوان: “عبث”.. وهبل فى الجبل..!

× الحكاية مصخت قوى على قولة إخواننا الصعايدة..

فاليومين دول ماسورة فتاوى ضربت فى البلد كلها.

خد عندك، شيخ أزهرى معمم خرج علينا بافتكاسة جديدة لنج تؤكد أن فريضة الحج يمكن أن تؤدى فى شهر ذى القعدة بدلاً من ذى الحجة..

ولكى يؤكد صحة افتكاسته ضرب له، وهو قاعد، روايتين تلاتة عن الشيخ “فسيخة إبن سردينة”، والشيخ “كفتة ابن طرب”؛ تؤكد أن الحج مش لازم يبقى فى
ذى الحجة؛ وإن سيدنا أبو بكر حج فى العام التاسع من الهجرة فى شهر ذى القعدة..!

دا طبعا غير الدكتور اللى بيموت فى الأضواء والكاميرات؛ اللى أفتى بأن المسلم يمكن أن يضحى بفرخة بدلاً من بهيمة الأنعام المنصوص عليها
فى القرآن الكريم..!!

طبعا أنا لن أطالب الأزهر بالتحقيق مع هؤلاء المشايخ “اللى بيفتوا على روحهم”..أنا بس باأطالبه يديهم حبيتين “انتينال”؛ علشان يوقفوا إسهال الفتى اللى بيعانوا منه ..!

ربنا يشفى..!

× بصراحة أنا مش عارف ليه الأمريكان عايزين يتأكدوا قبل ما يبعتوا لإسرائيل شحنة قنابل وزن ألفين رطل إنها مش هاتستخدم فى ضرب المدنيين الفلسطينيين..!!

يا جماعة ماإنتم سيد العارفين أكيد طبعا “النتن” ومعه مجرمى الحرب مش هايستخدموها فى ضرب المدنيين.. هما إتجننوا..؟!

دول هايضربوها “عيارين فى الهوا” فى حفلة طهور الصهيونى المتطرف “بن غفير”.. وفى فرح ابن عمدة تل أبيب.. الله يجحمه هو وأبوه واللى خلفوه ومعاهم النتن إبن النتن..!!