رابط الموقع الرسمي لرئاسة الجمهورية

أخر كلام

266

× أسمع كلامك أصدقك أشوف أمورك أستعجب.. هو أفضل وصف لما يحدث من تناقضات على الساحة العربية من بعض الأشقاء للتأثير سلبا على دور مصر القيادى الرائد فى المنطقة..!

صحيح صدق من قال: اللهم اكفنى شر «أشقائى» أما أعدائى فأنا كفيل بهم..!!

× الدمعة كانت هاتفر من عينى وأنا أقرأ تفاصيل «الإعجاز العلمى» لشاب عراقى دخل موسوعة جينس من أوسع أبوابها..!!

فقد نجح بسلامته فى وضع تمنتاشر بيضة على ضهر إيده اليسرى، دون أن تقع، وبذلك حطم الرقم القياسى المسجل باسم مواطن بريطانى..!!

هو دا الإنجاز وإلا فلا..!! فكلنا عارفين إن وضع البيض على الإيد الشمال هو أفضل حل للقضاء على البطالة والجهل والفقر والمرض والجوع فى بلادنا العربية..!

هذا الإنجاز العلمى العربى الخطير ينطبق عليه ما قاله محمود عبد العزيز فى فيلم الكيف: «إدينى فى الهايف وأنا أحبك يافننس».. !!

طالما إن الحكاية بقت بالهيافة والتفاهة دى.. فمش بعيد  نلاقى شاب عربى بيتنافس على المركز الأول عالميا فى «طرقعة الصوابع» أو فى اللعب فى المناخير.. ما هو ده اللى إحنا فالحين فيه وبس..!!

× المطربة اللبنانية نوال الزغبى غلطت غلطة عمرها بعد أن أكدت أنها لا تعرف أن هناك ممثلا مصريا اسمه (………) ..!!

ياليلة سودا.. إزاى نوال تغلط الغلطة دى..؟!

دا «نمبر ون» ياست نوال.. أسطورة التمثيل والغناء والرقص.. يكفى إنه أحسن واحد بيرقص بالسنجة وهو بلبوص..!!

عموما يا نوال ها تندمى على الكلام ده.. فالغلط لحظة والندم سنين ياست الستات..!!

× عادى جدا إن الأخ بتاع المهرجانات، اللى بالع ضفدعة فى زوره، يتطاول على أم كلثوم وعبد الحليم حافظ ويقول إنهما راحت عليهما، وإن مهرجاناته هو وباقى العصابة «إياها» هى حاضر ومستقبل الغناء..!!

صحيح يا جدعان القوالب نامت والانصاص قامت..!!

× أنا مش عايز أقول رأيى بصراحة فى أداء منتخبنا فى بطولة كأس العرب بالدوحة؛ حتى لا أتهم بأننى با أكسر مقاديف ولادنا وبأشيع طاقة سلبية، خاصة وأن منافسات الدور الأول مازالت فى بدايتها..!

يارب أكون غلطان.. والغلط راكبنى من ساسى لراسى..!