× بعد الإجازة الطويلة اللى منحتها الحكومة للموظفين.. ياريت حكومتنا الرشيدة تتم جميلها وتدى الموظفين كام يوم إجازة تانى.. يرتاحوا فيها من الإجازة..!!

× بأمارة إيه سعر كيلو السمك البلطى يوصل لمائة جنيه..؟!

إيه علاقة “البلطى” بالحرب الروسية الأوكرانية..أو بارتفاع أو انخفاض الدولار.. أو بموجة التضخم العالمية.. هو مش البلطى دا مرطرط فى بحيرة السد.. وفى النيل.. ولّلا ساب مصر وأخد جنسية كوالالمبور.. فأصبحنا نستورده بعد أن كنا ننتجه..؟!!

بصراحة حاجة تجنن العفريت..!

× بالمناسبة بعد أن وصل سعر كيلو اللحمة لتلتمية وخمسين جنيه.. بافكر أشترى لى إتنين كيلو أحوشهم للزمن..!!

× لإنى مواطن صالح وماشى جنب الحيط..فقد استجبت لدعوة الحكومة والشهر العقارى ورحت أسجل العقار اللى حيلتى وكلى أمل وتفاؤل بالحياة.. لكن عينك ماتشوف إلا النور..!!

  فقد اكتشفت إنى ساذج سذاجة القروى اللى بهرته أضواء المدينة فشرب من خمرها.. وأحب النساء..!!

فقد ظللت ألف حوالين نفسى شهر كامل يا مؤمن..وكل خطوة أخطوها ترجعنى لورا عشر خطوات..!!

وبقيت عامل زى العندليب الأسمر وهو بيغنى بأسى: “اللى مشيته رجعت أمشيه واللى قاسيته رجعت أقاسيه”.. وكل خطوة باأدفع المعلوم.. بحق وبدون وجه حق.. وحتى هذه اللحظة لم يتحرك أى شىء..!!

 عموما.. لقد اكتشفت أخيرًا إن الحكومة والشهر العقارى عايزين يثبتوا لنا بالدليل القاطع والبرهان الساطع أن تسجيل أى عقار فى مصر هو من رابع المستحيلات زيه زى الغولة والعنقاء والخل الوفى..!!

× بعد إعلان “الحاج أبو نسمة” ترشحه لانتخابات الرئاسة الأمريكية العام القادم.. أخشى ما أخشاه أن يعلن الحاج أبوحنان هو الآخر ترشحه للانتخابات.. وبكدا هاتبقى عيشة العالم مرار طافح..!!

فقد أثبتت التجربة والأيام السودا التى مر ويمر بها العالم أن الحاج أحمد زى الحاج إزدحمد..!!

يعنى بالمختصر المفيد: من الحاج أبونسمة للحاج أبو حنان.. يا قلبى لا تحزن..!!

× شركات السياحة اللى عاملة عروض للراغبين فى الحج هذا العام بخصومات تصل إلى حوالى عشرين ألف جنيه.. أكيد دى شركات بتلعب التلات ورقات..!

فإذا كانوا بيخصموا بالعشرين ألف جنيه للحاج الواحد.. فمعنى ذلك أن أرباحهم قد المبلغ دا تلات أربع مرات..!

فين الضمير.. فين الدين.. فين الأخلاق.. فين الرقابة.. فين وزارة السياحة..؟!

أكيد كلهم راحوا فى الوبا زى ما راحت هنادى يااماااااى..!!