محسن حسنين

× إيه البهدلة وقلة القيمة دى..؟!

 إزاى أعضاء مجلس النواب الموقر يعملوا كدا فى وزير التموين ويبهدلوه كل هذه البهدلة السودا.. دول كان ناقص يشتموا بالأب والأم..؟!

 بصراحة أنا لو من وزير التموين كنت رميت لهم  استقالتى فورًا فى قلب المجلس الموقر.. وفى ستين داهية الكرسى والمنصب والموكب والحراسة والعربية المرسيدس والهيل والهيلمان والبتنجان.. المهم الكرامة..وياروح ما بعدك روح..!

 لكن يبدو إنى نسيت حاجة مهمة جدًا، وهى أن الوزراء عندنا يقالون ولا يستقيلون.. وإن الإحساس نعمة اللى ينكرها.. يعمى..!!

× بالمناسبة إزاى مجلس الوزراء الموقر يسكت على إهانة وزير من وزرائه بهذه الصورة.. المفروض إن المجلس يضرب كرسى فى الكلوب ويرد على إهانة وزير التموين بإستقالة الحكومة كلها.. فكرامة الوزير من كرامة الحكومة.!!

 نعم يجب أن تستقيل الحكومة كلها على بعضها..ويرتاحوا ويريحونا.. لو مش من باب المسئولية التضامنية.. على الأقل من باب العشرة والعيش والملح.. العيش أبو شلن والملح أبو تلاتة تعريفة..!!

 فالعشرة ماتهونش إلا على ولاد…… الحلال..!

 أيوه مشوها “ولاد الحلال” علشان خاطرى.. أنا عندى عيال بأربيها..!

× يا جماعة بطلوا هرى ولت وعجن فى موضوع محمد صلاح وإزاى بيلعب مع ليفربول وإزاى بيلعب مع منتخبنا الوطنى..؟!

 صدقونى “مو صلاح” بتاع ليفربول مش هو “محمد صلاح” بتاع المنتخب الوطنى..

 فمو صلاح بتاع ليفربول بياكل النجيلة أكل.. أما محمد صلاح بتاعنا ف”بياكل…. رز مع الملايكة”.. لامؤاخذة..!!

× إيه البشاعة دى..!

 مش عارف الناس زعلانة ليه من عودة السيدة نجاة الصغيرة للأضواء مرة أخرى لحضور حفل لتكريمها..؟!

 قال إيه لأن السن ليه أحكام؛ وإنها كان يجب أن تختفى تمامًا إحترامًا لسنها بعد أن وصلت للخامسة والثمانين..!

 بصراحة الناس دى فى منتهى الجليطة؛ ومفيش فى قلوبها رحمة ولا ذرة إحساس..

 إنتم مين علشان تحكموا على فنانة محترمة رقيقة ملتزمة، هى أحد أعمدة قوانا الناعمة، بالإعدام بسبب عمرها؛ وبدلاً من أن تدعوها لحب الحياة التى وهبها الله لنا بتطالبوها بأن تبحث لها عن تربة قبل الترب ماتغلى..؟!

 بطلوا قرف بقى.. قرفتونا..!