30 يــونــيــو .. إرادة شـعـــــــب

أخر كلام ..

52

للمرة الألف بقول إننا لا نحتاج لحكومة تسيير أعمال فى ظل التحديات الصعبة الداخلية والخارجية التى تواجهنا؛ لا نريد وزراء متقوقعين خلف مكاتبهم الفخمة المكيفة.. نريد الحكومة ووزراءها مع الناس فى الشارع..!

لماذا لا يعقد مجلس الوزراء اجتماعه فى قلب مصانع الغزل والنسيج بالمحلة الكبرى ليبحث مشاكلها على أرض الواقع وسبل حلها.. ولماذا لا يعقد اجتماعه التالى فى مصنع الحديد والصلب بحلوان أو فى مناجم الحديد بالواحات البحرية؛ ولماذا لا يخصص اجتماعا خاصا لبحث إعادة المراجل البخارية للحياة مرة أخرى.. أو وقف انهيار مصانع الأسمنت الوطنية.. أو تحريك المياه الراكدة فى توشكى..؟!

أقول قولى هذا داعيا الله أن يكون كلامنا خفيفا عليهم.. الحكومة ووزراء الحكومة.. اللهم آمين..!!

 أنا سعيد جدًا بأداء الأحزاب المصرية اللى على الساحة واللى تسد عين الشمس..!!

فالأحزاب إيدها فى إيدين الحكومة وبتقدم مبادرات هايلة للنهوض بالوطن ومواكبة النهضة الشاملة التى بدأنا مشوار الألف ميل فيها.. وفوق كل ده وده بتنزل للناس فى الشارع وبتتعرف على احتياجاتها على أرض الواقع..!!

بصراحة الأحزاب، اللى زى الساعة السويسرية لا بتقدم ولا بتأخر، قايمة بواجبها أربعة وعشرين قيراط وكلنا حاسين بإنجازاتها التى لا تعد ولا تحصى واللى هى أكتر من.. عدد شعر رأس الكابتن وائل جمعة..!!!!!

 مش عارف ليه كارولين ماهر بطلة مصر والعالم فى التايكوندو زعلانة وواخدة على خاطرها علشان محدش مهتم بيها رغم إنها حاصلة على 120 ميدالية ولقب عالمى..!!

يا ست الستات إنت اللى غلطانة من ساسك لراسك.. إحنا مبنعرفش غير بتوع الكورة، كان فيها إيه يعنى لو لعبت كرة قدم بجانب التايكوندو وسميتى نفسك كهربا أو ولعة.. أو شطة أو بطة.. كان زمانك بقيتى حاجة تانية خالص.. مذيعة ومحللة رياضية وسياسية كمان، وعضو فى اتحاد الكورة، وهاتتاجرى فى الساعات وفى ملابس اللعيبة؛ وهتلعبى بالفلوس لعب.. وكان زمانك بتتحاكمى زى اللى بيتحاكموا دلوقت..!!

قال بطلة تايكوندو قال..؟! ياكارولين افتكرى لنا حاجة حلوة..!!!!

 واضح إن الفنان هانى شاكر نقيب الموسيقيين بيمشى على سطر وبيسيب سطر.. ففى الوقت اللى منع فيه حمو بيكا والمدفعجية وكسبرة صرح للممثل إياه بتاع نمبر وان إنه يغنى وهو قالع هدومه..!!

يا هانى امنع هذا الغناء فورًا إحنا مش ناقصين قرف، وقبل كل ده لازم تعترف إن تصريحك للممثل ده بالغنا «غلطة وندمان عليها».. زى ما بتقول فى أغنيتك..!!

 الراقصة «إياها» قالت إن «ناشيونال جيوجرافيك» عملت برنامجا وثائقيا عن مشوار حياتها..!!

طبعا إحنا مصدقينك يا ست الكل من غير ما تحلفى.. ده أنا بالأمارة كنت قاعد على اليمين والست «نشوى جغرافيك» على الشمال وحضرتك بتحكى قصة حياتك من طأطأ لسلامو عليكو على واحدة ونص.. وكان الواد «ديسكفرى» صبى العالمة بيلم النقطة..!!

يخرب بيت الصنف اللى بتشربوه..!