لابد من التدخل السريع لإنقاذ شركة الحديد والصلب؛ بعد التقرير الخطير الذى صدر عن الجهاز المركزى للمحاسبات؛ والذى شكك فى إمكانية استمرار الشركة بوضعها المتردى الراهن؛ فالمديونيات التاريخية تخنقها.. والآلات والمعدات متهالكة.. والدنيا بايظة تمامًا..!
أتمنى أن تتدخل الدولة وبسرعة لإنقاذ الشركة؛ بعيدا عن وزير قطاع الأعمال الذى يرى إن بيع أصول الدولة هو الحل؛ وهو شعار المرحلة وكل مرحلة..واسألوا شركات الأسمنت..!!
بصراحة الصورة اللى اتنشرت لرئيس الوزراء وهو بيسلم على رئيس البنك الدولى بتقول حاجات وحاجات!
أقول للناس اللى هاتدخل جهنم حدف واللى نازلين تريقة ومسخرة وتحفيل على الجامعة العربية: كفاياكم بقى إنتو ماعندكوش رحمة.. الضرب فى الميت حرام..!!
مش عارف نصدق مين ونكدب مين..؟!! الرئيس الأمريكى ترامب اللى أعطى الضوء الأخضر للغزو التركى لسوريا؛ وللا الرئيس الأمريكى ترامب اللى بيهدد بمعاقبة تركيا على غزوها لسوريا..!!
أنا شخصيا مصدق الست «أم ترتر»، تولع بجاز، اللى بتقول: «السياسة نجاسة»..!!
إذا كانت أسعار السلع على بطاقة التموين أغلى من أسعار البقالين.. فمعنى ذلك إن الحكومة بتتربح من «مهدودى الدخل».. ومحلات البقالة بتدعمهم..ووزارة التموين نايمة فى العسل وعاملة نفسها من بنها..!
إلى الأخ «إياه» عاشق الفضائيات واللى بيفتى على روحه عمال على بطال: بقى بذمتك يا راجل يا طيب الصحابة لما جم مصر وشافوا النيل تعوذوا منه وقالوا إنه نهر من أنهار جهنم..؟!!
طيب سيبك من حكاية إن مفيش أنهار فى جهنم، وسيبك من إن الكلام ده كله مشموم ومفيش أى دليل عليه.. إيه اللى هانستفيده من الحدوتة الخايبة دى..؟!
ياباشمهندس دا علم لا ينفع وجهل لا يضر..!
مش عارف الناس زعلانة ليه من قائد الطائرة اللى خللى الممثل إياه يسوق الطيارة بداله وهى مليانة ركاب..؟!
ياجماعة دا «نمبر ون» يعمل كل مابدا له.. يسوق طيارات.. قطارات.. دبابات.. بلح أمهات.. وأبونا السقا مات..!!
المستوى «الهايل» اللى لعب به منتخبنا أمام بتسوانا لا يؤهل الفريق للعب فى بطولة إفريقيا؛ لكن يؤهله بالعافية للعب فى دورة الأسد المرعب للكورة الشراب بالدويقة ومنشية ناصر..!!
