× أنا راضى ذمة أعضاء مجلس النواب الموقر: بذمتكم.. كم واحد فيكم بيصحى من نومه بيفكر فى فكرة جديدة خارج الصندوق من أجل مصر وشعب مصر..؟!!

قبل ماتجاوبوا عايز أفكركم بس بحاجة بسيطة وهى إن اللى بيكدب بيروح النار مش بيروح العلمين الجديدة..!!

× بالمناسبة..النواب اللى «نايمين» على روحهم دايما فى الجلسات..دول مش نايمين علشان حاجة بطالة لاسمح الله.. دول نايمين عامدين متعمدين علشان «يحلموا» بمستقبل أفضل لمصر..!!

سامحنى يارب..!!

× ملف التعليم لايجب أن يترك فى يد وزير واحد مهما بلغت عبقريته؛ فالتعليم أمن قومى يجب أن يستتب حتى نضمن أمن واستقرار هذا البلد.

أقول قولى هذا بمناسبة الهرى اللى شغال عمال على بطال على التعليم وتكدس الفصول وعمنا….. «طارئ» ..!!

× لسه «جزار» توظيف الأموال بيطلع لسانه لهيئة الرقابة المالية ومغرق وسائل التواصل الاجتماعى إعلانات يغرى فيها الغلابة بعائد يزيد على تلاتين فى المية بشرط ألا يقل مايدفعونه له عن مائة ألف جنيه..جنيه ينطح جنيه..!!

أخشى إن لم توقف الجهات المسئولة هذا الجزار أن يظهر لنا ألف جزار؛ وأن تعود شركات توظيف الأموال أقوى مما كانت..ونرجع تانى للفيلم الهابط بتاع الريان والسعد وغيرهما.. والضحايا اللى بتنتحر واللى جالهم شلل..!

سؤالى لمسئولى هيئة الرقابة المالية اللى نايمين فى نومة: «إنتى جاية تشتغلى إيه»..؟!!

× ياجماعة خفوا شوية على أبو تريكة..فقلب حضرته قلب «خساية» لم يتحمل منظر متفرج إنجليزى فى ماتش كورة أصيب بأزمة قلبية وعالجوه منها ..!!

فـ «تريكة» زى ماكلنا عارفين هو حساس الجيل فى فيلم «طير إنت».. «سومة العاشق»..!!

× أنا مش متغاظ من أخبار الممثلات.. لبسوا إيه وقلعوا إيه..أنا بس اللى غايظنى إنهم ما بيسموش الحاجات بأسمائها الحقيقية.. فعيب إنهم يسموا المهرجان إياه «مهرجان سينما» بل يجب أن يسموه «مهرجان عريان باشا ملط».. أو مهرجان اللحم الأبيض المتوسط..!!

× بالمناسبة.. إذا كان صاحب المهرجان شايف إن من ينتقدون العرى فى المهرجان متخلفون.. فإننى أدعو الله أن يحينى متخلفا ويميتنى متخلفا..ويحشرنى فى زمرة المتخلفين..اللهم آمين.