«هو مين اللى بيستفيد من قرارات العلاوات الاستثنائية اللى بتصدر غير الموظفين فى الحكومة ومش كلهم كمان وعددهم صغير.. فين نصيب اللى شغالين فى القطاع الخاص وعمال اليومية واللى مش شغالين أصلا؟»..

دايما بنسمع الكلام ده كل ما القيادة السياسية تصدر قرارات خاصة بالحماية الاجتماعية، فى محاولة من الدولة لتخفيف تداعيات الأزمة الاقتصادية العالمية عن كاهل المواطنين..

طيب خلينا نبدأ من آخر قرارات حماية اجتماعية واللى أصدرها الرئيس السيسي خلال زيارته لمحافظة بنى سويف، والقرارات دى هيستفيد منها 21 مليون أسرة تقريبا يعنى بمتوسط 80 مليون مواطن على الأقل وهتكلف الدولة 60 مليار جنيه سنويا..

فى بريطانيا، اللي في كتب التاريخ كانوا بيقولوا عليها “الدولة العظمى التي لا تغيب عنها الشمس”، أحدث تقرير عن الحالة الاجتماعية والصادر عن هيئة استشارية مستقلة برئاسة عضو محافظ في مجلس اللوردات، قال إن نسبة الأسر الفقيرة بالبلاد وصلت ما يقارب 21-24%، (يعنى حوالى 15 مليون نسمة من إجمال 68 مليونا) ودى أعلى نسبة فى تاريخها وكمان انتشرت ظاهرة “الفقر المدقع” الذى يعانى منه 31% من الأسر الفقيرة والذين يكافحون لتوفير متطلباتهم الأساسية من طعام وكهرباء وغيرهما.

بريطانيا مقدرتش تساعد مواطنيها على عبور الأزمات العالمية المتلاحقة من كورونا وحرب روسيا وأوكرانيا ومقدرتش توفر من ميزانيتها الضخمة جدا غير 36 مليار جنيه إسترلينى، وهو ما يعادل 500 جنيه إسترلينى فى الشهر لـ 6 ملايين أسرة فقيرة فقط (يعنى فيه 9 ملايين بريطانى الدولة سيباهم يواجهوا الفقر بنفسهم وبدون أى حماية اجتماعية).. وتشمل هذه التكلفة مزيجًا من الإعانات وزيادات الرواتب، والاستثمار في تخفيض تكاليف الإسكان والطاقة، وتحسين الخدمات الصحية.