صالون الرأي
أخر كلام
By amrفبراير 20, 2024, 17:30 م
878
الإعلام الأمريكى قايم قيامة يا حرااااام على الراجل الطيب الحاج أبو نسمة؛ اللى لا بيهش
ولا بينش.. قال إيه..؟! لأنه عايش فى عالم تانى ومالوش علاقة بالواقع.
فهو بينسى على طول هو رايح فين وجاى منين..؟
حرام عليكم.. دا الراجل قايد صوابعه شمع للشعب الأمريكى.. ومشغول ليل نهار بعمل محادثات على أعلى المستويات.. مع الأموات.. أى والله مع الأموات..!!
وآخر محادثات عملها مع الرئيس الفرنسى فرنسوا ميتران اللى مات وشبع موت من 28 سنة بالتمام والكمال..!
وفوق ده وده.. أبو نسمة عمال يغيّر طول اليوم فى خريطة العالم.. فمصر بقى اسمها المكسيك..
وأوروبا بقت على شمال كوبرى القبة.. والصحراء الغربية بقت بعد الريست هاوس بشوية.. زى ما قالت المطربة شادية بالضبط..!
ياريت الإعلام الأمريكى يسيب الحاج أبو نسمة
فى حاله.. فاللى فيه مكفيه.. ربنا يشفيه..!
اللى غايظنى وحارق دمى كمية الناس اللى لسه بتحتفل بعيد الحب وهاتك يا ورد ودباديب حمرا
وهم مايتلم..!
يعنى الحكومة مشلوحانة، وما تسألونيش يعنى إيه مشلوحانة، ورافعة أسعار الكهربا والمية والغاز والبنزين حتى تذكرة دخول الجناين العامة خلوها بعشرين جنيه؛ ولما تسأل الموظف عن السبب يقول لك بكل نطاعة كل سنة وإنت طيب.. “هابى فلانتاين داى” بقى يا باشا..!
تدخل السوبر ماركت من دول وكأنك دخلت نار جهنم، والعياذ بالله، كل شىء وأى شىء حتى أسعار المش والجعضيض بترتفع كل ساعة مش كل يوم؛ لكن التاجر الفاجر مش ناسى أبدًا عيد الحب.. فحاطط لنا على الباب عامل غلبان لابس دبدوب بيوزع ورد بمناسبة “الفلانطاين”..!
يخرب بيت كدا.. حكومة مالهاش كتالوج وتجار هايروحوا النار.. قرفتونا..!
عمومًا الست أم كلثوم.. قالتها حكمة من زمان:
“حب إيه اللى أنت جاى تقول عليه، إنت عارف قبله معنى الحب إيه”..!
يا جماعة كفاية تحفيل وهرى ولت وعجن فى موضوع تولى حسام حسن تدريب المنتخب.
فأنا شخصيًا شايف إن منظومة الكورة كلها على بعضها بايظة؛ ولابد من إصلاحها بالجملة مش بالقطاعى..!
فالمنظومة كلها عبارة عن أعمى بيقود أعرجا..
لا مؤاخذة..!
آخر نكتة ..!
مطربة إسرائيلية، درجة عاشرة، عملت أغنية؛ على وزن ولحن أغنية بنت السلطان بتاعة أحمد عدوية، بتهدد فيها يحيى السنوار قائد حماس بالقتل..!
هو دا الكلام.. فمن الواضح إن السنوار ما بيجيش غير بالعين الحمرا..!
