مازلت مصرا على أن بيع أصول الدولة عمال على بطال هو بمثابة كارثة اقتصادية؛ فهناك صناعات استراتيجية يجب ألا تبيعها الدولة تحت أى ظرف؛ مثل الحديد والصلب والأسمنت والأدوية.. والصناعات التى ترتبط ارتباطا مباشرا بالأمن القومى المصرى..
ونحن لا نعيد اختراع العجلة فهناك دول رأسمالية تحتفظ بصناعاتها ومرافقها الاستراتيجية فى حوزتها.. وبريطانيا ليست منا ببعيد..!
إننى ضد إغلاق وبيع شركات الأسمنت؛ كما عارضت من قبل بيع شركة المراجل البخارية، وقد كانت إحدى الشركات الاستراتيجية، واشتراها اليهود بأبخس الأثمان هى والميناء النيلى التابع لها ليتركوها خاوية على عروشها حتى الآن..!
أرجوكم أوقفوا عمليات الخصخصة عمال على بطال حتى لا نندم وقت لن ينفع فيه أى ندم..!
آخر فتوى للأخ «إياه» العاشق للظهور فى الفضائيات واختراع فتاوى ما أنزل الله بها من سلطان هى أنه من الممكن أن يؤدى الحاج مناسك الحج بقميص وبنطلون..!!
يخرب بيت دماغك جبتها إزاى دي..؟! قميص وبنطلون..؟! دا مش بعيد بكرة يقول إن الحج ممكن بـ «البنتكور».. أو «البيجامة»..!!
دا لازم يغير الصنف اللى بيتعاطاه..!
لو طبقنا القانون الذى أقره الرئيس الفلبينى منذ أيام بمعاقبة من يخدشون الحياء العام.. فأنا على يقين من أن كل بوتاجازات التوك شو عندنا؛ واللى بيهيجوا الشعب عمال على بطال هايباتوا كلهم فى التخشيبة؛ ومعاهم طبعا الأخ «إياه» اللى فرحان بملابسه الداخلية.. وهلا هلا ع الفانلة..!
علشان تعرفوا إن البيت الأبيض عمره ما بينفع فى اليوم الأسود..وزير الخارجية الأمريكى أعلن بوضوح أن بلاده لن تتدخل فى حادث اختطاف إيران لسفينة بريطانية؛ وقال إن على بريطانيا أن تحمى سفنها بنفسها..!
يعنى بالبلدى كدا «كل واحد يخليه فى كوزه لما نعوزه»..!!
الندالة ليها ناسها برضه..!
برافو نقيب الموسيقيين هانى شاكر فقد قرر عدم التعامل مع عشوائيات الغناء فى مصر حمو بيكا والعفريت وكزبرة وشاكوش وغيرهم..!!
بصراحة عنده حق دى مش أسامى مطربين دى أسامى حرامية غسيل لا مؤاخذة..!!
يا ليلة سودا..حتى المطرب «الأخنف» عايز واسطة علشان الناس تسلم عليه..
عموما الحق مش عليه.. الحق على اللى عمل له قيمة وسيما.
الله يرحمك يا عبد الحليم يا حافظ..!