صالون الرأي
أخر كلام
By amrفبراير 03, 2020, 13:51 م
942
إلى رئيس الجامعة «إياه»: إيه علاقة تجديد بيت أبوك بتجديد الخطاب الدينى.. لا مؤاخذة..؟!
واضح إن حضرتك بتهزر فى وقت الجد حول أخطر قضية يواجهها العالم الإسلامى كله الآن.
عموما تستاهل كل اللى عمله فيك شيخ الأزهر على الهواء مباشرة قدام أمة لا إله إلا الله..!!
أنا مش قصدى أشمت فى حضرتك طبعا لا سمح الله.. أنا جاى أهدى النفوس مش أكتر..!!
أجمل خبر قرأته هو إعلان محافظ البنك المركزى رفض عرض صندوق النقد الدولى لإقراضنا مبالغ جديدة.
أتمنى أن تكون هذه بداية جادة لإغلاق حنفية الاقتراض المفتوحة على البحرى..!
فالديون، مهما كان مصدرها، هى هم بالليل ومذلة بالنهار.. !!
يا جماعة صفقة قرن إيه اللى أغضبت الفلسطينيين والعرب..؟! كلها يومين تلاتة شجب واستنكار.. وبعدين ترجع خالتى من عند خالتك..ويتفرقوا الخالات..!!
فحال العرب عامل زى حال خالتى شفيقة بالضبط : ساعة تروح وساعة تيجى.. هههههه..راااااااااحت..!!
اللى قاعدين يتريقوا على وزيرات لبنان «المزز»؛ وإزاى وزيرة «مزة» تمسك وزارة الدفاع.. عايز أفكرهم إن المسألة مش بالعضلات ولا الشنبات؛ لكن بالدماغ والفكر والرؤية.
فقد تولى «الكفيف».. خدوا بالكم الكفيف «ديفيد بلانكيت» حقيبة وزارة الداخلية البريطانية، ومن قبلها وزارة التعليم، ومن بعدها وزارة شؤون المتقاعدين.
وكان وزيرا زى الفل.. لكنه استقال ليس بسبب أداءه؛ ولكن لسبب تانى خالص.. فضائحه النسائية.. فقد كان خلبوصا ابن الإيه..!
بعد الهجوم البرلمانى الكاسح ضد وزارة التنمية المحلية بسبب تلال القمامة المنتشرة فى كل مكان.. أدعو الله عز وجل بأن يهلك «الوحشين بالوحشين» ويخرجنا من بينهم سالمين..!!!
أيوه اسمهم «الوحشين» مش حاجة تانية خالص.. سامحنى يارب..!
أنا زعلان قوى من الناس اللى هاتروح جهنم حدف؛ واللى وصفت زواج شابة فى عز شبابها من ملياردير تسعينى بإنه جواز مصلحة علشان الفلوس مش أكتر..!
يا جماعة وليه ماتكونش البنية بتحب بابا جدو؛ فمراية الحب عميا.. وزى مابيقول عمنا شكوكو: «الحب فى القلب زى الرز فى الكوسة»..!!
