بعد ما مسكوا رئيس مصلحة الضرائب متلبسا بالرشوة ومن قبله رئيس مصلحة الجمارك.. سؤالى الساذج لـ «معاليه» هو: حضرتك بتختارهم إزاى.. ومنين..؟ّ!

فمن الواضح إن معاليك بتختارهم من مغارة على بابا.. لا مؤاخذة..!!

طبعا محدش فكره يروح لبعيد ويفتكر إنى قصدى حد معين..!

أنا لا أقصد لا زعيط.. ولا «معيط».. ولا نطاط الحيط..!! سامحنى يارب..!!

 يا ليلة سودا.. بعد ما كان عبد الحليم بيغنى للشعر الحرير اللى على العيون يهفهف ويرجع يطير، بقينا فى زمن المطرب اللى بيغنى لواحدة مشيها بطال لا مؤاخذة بكلمات «دبش» بيقول فيها: «دواك فضى الجيوب وخلى الناس تعايب.. لسه لك عين تدوب.. إنت مش عايز تتوب.. يا ملطشة القلوب يا جلّاب المصايب»..!!

دا ردح وفرد ملاية مش غنا.. وواضح إن اللى كتبت الكلمات دى  الست أم ترتر الرداحة الأبيحة ست جيرانها..!!!

 رغم اعتراضى طبعا على أدوار البلطجة التى يقوم بها محمد رمضان؛ إلا إننى لم أفهم لماذا عملت الفنانة الكبيرة سنا ومقاما «س . ع» من الحبة قبة؛ عندما رفضت تمثيل دور أمه  فى مسلسل تليفزيونى قائلة: «أنا أخلف ده.. دى إهانة لتاريخى»..!!

هو حد فهم حضرتها غلط إنها هتخلفه مش هتمثل معاه..؟!

عمومًا كل شىء جايز حتى خلف العجايز..!!

 واضح إن الخيار والفاقوس شغال على ودنه فى نقابة الإعلاميين..!

فقد اتصلت بى الإعلامية الكبيرة عزة جنيدى، والتى كانت إحدى أيقونات الإذاعة المصرية، شاكية من أن نقابة الإعلاميين أهانت تاريخها، وعمرها الذى أفنته فى الإذاعة حتى وصلت لدرجة وكيل وزارة، ورفضت قيدها بالنقابة بحجة أنها لا تقدم أى برنامج حاليًا..!

يا جماعة عيب.. كفاية بهدلة وإهانات لعمالقة ساهموا فى تشكيل وعى ووجدان المصريين.. وكل جريمتهم إنهم وصلوا لسن المعاش..!

هى نقابة الإعلاميين دى مالهاش صاحب يسأل عليها..؟!

 بابا جدو الإيطالى أبو تسعة وتسعين ربيعا اللى طلق زوجته اللى عمرها سبعة وتسعين سنة بعد عشرة عمر استمرت سبعة وسبعين عاما؛ لأنها بعثت رسالة غرامية لفران من تمانين سنة.. فكرنى بنكتة الراجل اللى قالوا له: مراتك بتخونك مع الكهربائى.. رد عليهم ببرود قائلًا: بس ماتقولوش كهربائى.. دا لا كهربائى ولا بيفهم فى الكهربا..!!!