بعض المحافظين الجدد اللى عايزين يركبوا الترند بيقوموا اليومين دول بحملات تليفزيونية على مرافق متهمش المواطن البسيط فى شىء.. وهاتك يا تهديد ووعيد فى الموبايل.. المدير الفلانى يترفد فورا.. والمدير العلانى هاتوه لى مكتبى متعلق من رجليه.. إلى آخر ذلك من الكلام اللى ميتشبعش منه ويشرح القلب الحزين..!

يا جماعة لو عايزين تشتغلوا بجد انزلوا الأسواق الشعبية والحوارى والقرى والكفور وشوفوا الناس بتشتكى من إيه.. وبطلوا الأفلام الهابطة اللى متقنعش طفل فى كى جى ون.. لأن الناس مش ناقصة أفلام تحرق الدم.. لا بتودى ولا بتجيب..!

× وبعدين.. إحنا فى دولة قانون ومؤسسات.. إزاى محافظ أو وزير أو حتى رئيس وزراء، مع كامل احترامي لهم جميعا، يرفد موظفا على الهوا قدام الكاميرات بدون تحقيق ولا دياولو..؟!

ده لو شغال فى طابونة عيش بلدى هيرفدوه بطريقة أشيك من كده بكتير.. هيقولوا له بابتسامة عريضة: المعلم مبسوط منك أوى وبيقول لحضرتك.. متجيش بكرة..!

× الطعمية.. سلعة استفزازية!

للمرة الألف بقول إن التجار الفجار، اللى هيخشوا النار حدف، هم سبب حالة الغلاء المبالغ فيها اليومين دول..

صحيح الأسعار ارتفعت قليلا؛ لكن ليست بالصورة العشوائية التى يفرضها التجار على الناس..

خد عندك أبسط أكلة وهى الفول والطعمية؛ فسعر الفول، مازال كما هو لم يزد؛ لكن أصحاب العربيات والمحلات رفعوا الأسعار بشكل جنونى حتى أصبحت أكلتنا الشعبية من السلع الاستفزازية..!

الناس دى لازم تتحاكم بتهمة إرهاب المواطنين؛ وتكدير الأمن والسلم العام..!

والله ما بهزر؛ فالمثل بيقول: عض قلبى ولا تعض رغيفى..!!

× والله حاجة غريبة ومريبة فعلاً.. فالتجار قاموا برفع أسعار كل أصناف الخضار فجأة لتصبح كلها بسعر واحد هو خمسة وتلاتين جنيها.. مش عارف ليه..؟!

خايف أسألهم  ليردوا، بكل بجاحة، إن السبب هو إغلاق مضيق هرمز وارتفاع أسعار البترول فى الأسواق العالمية..!

هو ده اللى ناقص..!

× مش عارف أضحك ولّا أعيط ولّا ألطم..!

والله العظيم هذا حدث معى فعلا.. من كام يوم باسأل بتاع الخضرة: ليه يا ابنى غليت سعر الجرجير والبقدونس بالشكل ده..؟!

رد على بسرعة ودون أى تفكير: هو بمزاجى ما أنت شايف الحرب اللى شغالة اليومين دول يا باشا..!

يا ليلة سودة.. حتى بتوع الفجل والجرجير بيلعبوا سياسة..؟!

شعب مالوش كتالوج فعلا..!

× بالمناسبة.. نفسى ومُنى عينى أسأل بتوع جهاز حماية المستهلك؛ اللى سايبين الأسواق تضرب تقلب، بصوت الفنانة مارى منيب: إنتى جاية تشتغلى إيه..؟!

وخايف تكون شغلتهم زى شغلة الفنان إسماعيل ياسين على المدفع.. برورررووووم..!