محسن حسنين
× اللى حضّر العفريت مش هايعرف يصرفه..!!
الكلام دا هايجيب لى وجع القلب.. لكننى ها أقوله ورزقى على الله..
لا تتركوا حل أزمة الديون فى إيد الحكومة وحدها ..وماتقولوش اللى حضر العفريت هو اللى لازم يصرفه، واللى شبكنا يخلصنا والكلام إياه اللى شبعنا منه.. مصر الآن فى مرحلة فارقة من تاريخها.. ولابد أن تتكاتف كل العقول للتعامل مع هذه المرحلة دون أن نضيع الوقت فى اللى كان واللي جرى..!
فالحلول التى يبشرنا بها الآن رئيس الحكومة لأزمة الديون نعرفها جميعا وحافظينها صم؛ ليس لأننا نقرأ الطالع أو بنضرب الودع؛ بل لأننا شفناها وعانينا منها طوال السنوات الماضية..!
وإذا كنتوا نسيتوا اللى جرى هاتوا الدفاتر تنقرا..!
× إذا كنتم عايزين الحق مش ابن عمه.. أزمة الديون لن تحل إلا بالاستعانة بأكبر العقول الاقتصادية؛ التي يؤكد تاريخها أنها دائما ما تفكر خارج الصندوق.
وفى تقديري أن من أبرز هذه العقول الدكتور فاروق العقدة محافظ البنك المركزي الأسبق ومحمد الأتربي رئيس البنك الأهلي ورئيس اتحاد البنوك.
ومن هذه العقول أيضا” الهواشم”: هشام عز العرب رئيس سى آى بى وهشام عكاشة رئيس بنك مصر.
كما يجب أن تتم الاستعانة بأصحاب الخبرات فى التعامل مع المؤسسات الدولية؛ خاصة الدكتور محمود محيى الدين وزير الاستثمار الأسبق ومدير عام صندوق النقد السابق، والدكتور يوسف بطرس غالى وزير المالية الأسبق.. والذى نجح خلال عمله فى صندوق النقد فى إنقاذ العديد من البلدان من الإفلاس ومنها اليونان وغيرها.
طبعا الكثيرون هايعترضوا على “غالى للى عمله بفلوس المعاشات.. لكننا نحتاج خبرته الآن لمصلحة مصر وشعب مصر التى هى أعلى وأغلى من كل “غالى”..!
هو دا الحق.. أما ابن عمه فما أعرفوش ومش عايز أعرفه..!
× الشهامة فى خبر كان..!
الفرق بين رجالة زمان ورجالة اليومين دول..إنهم زمان لما كانوا بيشوفوا خناقة بيتدخلوا لفضها ..
دلوقت لما بيشوفوا أى خناقة بيصوروها لحد ما الناس تقتل بعض؛ علشان يركبوا الترند..!
يا جماعة استقيموا يرحمكم الله.. فالشهامة هي الحاجة الوحيدة اللى مالهاش قطع غيار ..لامؤاخذة..!
× آخر نكتة: إخواننا البعدا، اللى هايخشوا جهنم حدف، أشاعوا أن شيخا من “شيوخ التليفزيون” أفتى بأنه لايجوز سلق الفرخة مع الديك فى حلة واحدة..!!
أنا شخصيا لى ملاحظات على هذا الشيخ؛ خاصة حكاية تأكيده أنه قرأ ربع مليون مرجع ديني.. لكننى على يقين من أنه لا يمكن أبدا أن يقول هذا الكلام العبيط ..!
وبعدين ياولاد الأبالسة هو الديك هايعمل إيه مع الفرخة وهما بيتسلقوا..؟!
إتلموا بقى.. الحكاية مش ناقصاكم..!!
