محسن حسنين

× والله العظيم عيب إن يحدث كل هذا النقص فى الأدوية فى مصر صاحبة حضارة السبعتلاف سنة..!

الصيدليات خالية من المضادات الحيوية والمليّنات وكل الأدوية الفوارة.. وغيرها وغيرها..

يا حكومتنا الرشيدة الناس ممكن تستحمل الضلمة لكنها متقدرش تستحمل نقص الدواء؛ لأن ده موت وخراب ديار والعياذ بالله.

طبعًا مش معنى كلامى إنكم توفروا الدوا وتقطعوا النور.. ليه متوفروش الإتنين مع بعض..؟!

كتير مش كده..؟! معلش إحنا طماعين مايملاش عينينا إلا التراب..!

سامحنى يا رب.

× إذا كان اللى بنى مصر كان فى الأصل حلوانى.. فإن اللى عمل طريق مصر إسكندرية الصحراوى حلوانى بردو.. بس تخصص بسبوسة..!!

× المناظرة العبيطة التى تمت بين الحاج أبو حنان والحاج أبو نسمة بتأكد إن أمريكا والعالم داخلين على أيام سودة.. أسود من قرن الخروب.. ربنا يستر..!

× الناس البُعدا اللى هاتخش جهنم حدف.. لفقوا للدكتور أسامة الأزهرى وزير الأوقاف الجديد كلاما عبيطا عن أن قطع الحكومة للنور هو للعظة والعبرة والتذكير بظلمة القبر..!

يخرب بيوتكم والبيوت اللى جنب بيوتكم.. ده تفكير أبالسة.. جبتوهاإزاى دى..؟!

× بالمناسبة.. بعد رحيل وزير الأوقاف السابق..هل تجوز صلاة “جمعة” من غير خطبة “جمعة”..أفيدونا أفادكم الله..!

× بعد زيارة “النتن ياهو” لكلب إسرائيلى أصيب فى حرب غزة.. بدأت أحترم الرجل لأنه أكد أنه بار بأهله.. وبيصل رحمه..!

× مش عارف ليه البعض على وسائل التواصل الاجتماعى كل شوية يعيد ويزيد فى التأكيد على أنه لا توجد أى ضرائب على المقابر..؟!

بيطمنوا الميتين؛ ولا بيفتّحوا عين وزير المالية الجديد علشان يمد مظلة الضرائب لكل اللى هيقابل وجه رب كريم..؟!

أنا مش مطمن والفار الملعون بيلعب فى عبّى.. إذا كان فرضوا ضريبة على الرملة والمية والهوا مش هيفرضوها على الميتين.. !

دول يفرضوا أبوها..!

× هى إيه حكاية زبيدة ثروت مع الستات..؟!

ممثلة لسه اسمها مكتوب بالرصاص بتقول إن كل اللى بيشوفها بيقول لها إنها الخالق الناطق زبيدة ثروت..!

وقبل كده واحدة، وشها يقطع الخميرة من البيت، قالت إن جوزها ألف فيها خمسمية قصيدة لأنها شبيهة زبيدة ثروت..!

يا جماعة قولوا لنا أنتم شبه زبيدة مين بالضبط..؟!

زبيدة بنت الطحاوى ولا زبيدة بنت أبو جليل..؟!